Bakı-Tbilisi xətti: Cənubi Qafqazda sabitliyin və əməkdaşlığın yeni mərhələsi - TƏHLİL
Gürcüstan Prezidenti Mixeil Kavelaşvilinin Azərbaycana ilk rəsmi səfəri təkcə diplomatik jest deyil, həm də iki ölkə arasında formalaşmış dərin strateji etimadın və gələcəyə yönəlmiş əməkdaşlığın simvoludur. Bu səfər Gürcüstan rəhbərliyinin Azərbaycanla münasibətləri regional siyasətdə prioritet hesab etdiyini göstərir və Cənubi Qafqazda sülh, təhlükəsizlik və inkişaf yönündə mühüm mesaj verir.
Azərbaycan və Gürcüstan arasındakı münasibətlər əsrlərlə davam edən tarixi əlaqələrə, enerji və nəqliyyat sahələrində sıx əməkdaşlığa və beynəlxalq təşkilatlarda bir-birinə dəstəyə əsaslanır. Bakı-Tbilisi-Ceyhan və Bakı-Tbilisi-Ərzurum kimi enerji layihələri, Bakı-Tbilisi-Qars dəmir yolu isə bu strateji əməkdaşlığın konkret nəticələridir. Prezident İlham Əliyev də vurğulayıb ki, bu gün Avropanın enerji təhlükəsizliyi Azərbaycan və Gürcüstan olmadan mümkün deyil.
Gürcüstanın Azərbaycanın ərazi bütövlüyünü dəstəkləməsi və Azərbaycanın da Gürcüstanın suverenliyinə hörmətlə yanaşması iki ölkə arasında nadir strateji etibar mühitinin mövcudluğunu göstərir. Bu, yalnız ikitərəfli münasibətləri deyil, həm də bütün region üçün nümunəvi əməkdaşlıq modelini ortaya qoyur.
Prezident Kavelaşvili də çıxışında qeyd edib ki, Cənubi Qafqazda sabitlik və firavanlıq ancaq ortaq səylərlə mümkündür. Onun fikrincə, xalqlarımız Qərbin "idxal etdiyi" dəyərlərdən çox, öz milli-mədəni əsaslarına söykənərək birgəyaşayış modelini inkişaf etdirməlidirlər.
Hazırkı qlobal çağırışlar — enerji təhlükəsizliyi, nəqliyyat marşrutlarının davamlılığı, yaşıl enerji keçidi kimi məsələlərdə Azərbaycan və Gürcüstan Qərblə Şərq arasında etibarlı körpü funksiyasını yerinə yetirirlər. Avropa İttifaqı ilə Azərbaycan arasında imzalanan enerji əməkdaşlığı memorandumu Gürcüstanın bu zəncirdəki tranzit rolu ilə daha da əhəmiyyət qazanır.
Kavelaşvilinin Bakıya səfəri həm də regionda yeni təhlükəsizlik və əməkdaşlıq arxitekturasının formalaşmaqda olduğunun göstəricisidir. Gürcüstanın mümkün vasitəçilik təşəbbüsləri, Azərbaycanın sülh çağırışları fonunda bu birlik modeli Ermənistan üçün də bir çıxış yoluna çevrilə bilər.
Nəticə etibarilə, Azərbaycan və Gürcüstanın birgə fəaliyyəti regionun geosiyasi xəritəsini dəyişmək, Qafqazda sülh və inkişaf üçün yeni perspektivlər açmaq gücündədir. Bu əməkdaşlıq artıq təkcə bəyanatlarla yox, konkret layihələr və birgə strateji addımlarla reallığa çevrilir.
Təhlil Analitik Qrup
