İlon Maskın imperiyası təhlükədə: Trampla münaqişə “Tesla” səhmlərinə zərbə vurdu

Dünyanın ən varlı adamı olan İlon Maskın imperiyası dağılmaqdan hələ uzaq olsa da, ABŞ prezidenti Donald Trampla artan münaqişə fonunda getdikcə zəifləyir.

Təhlil.az xəbər verir ki, Maskın Trampla ittifaqı daha əvvəl “Tesla” və “SpaceX”ə siyasi bonuslar gətirmiş və milyarderin sərvətini artırmışdı. Lakin ixtilaf Maskın Respublikaçıların yeni xərclərini tənqid etməsindən sonra yaranıb. Cavab olaraq “Tesla” səhmlərinin qiyməti düşməyə davam edir və investorlar hökumət dəstəyinin gələcəyini şübhə altına alırlar.

Mask “Amerika” adlı partiyasını - yeni siyasi qüvvəni elan etdikdən və 2026-cı il Konqres seçkilərinə təsir etmək niyyətində olduğunu söylədikdən sonra bazar ertəsi günü “Tesla” yenidən zəifləyib və səhmlər 6,8 faiz ucuzlaşıb.

Trampla ayrıldıqdan sonra Mask kağız üzərində təxminən 20 milyard dollar itirib və investorların ümumi itkiləri 100 milyard dolları keçib. Tesla səhmləri iyunun əvvəlindən bəri 14% ucuzlaşıb. Trampla münaqişə Respublikaçıların loyallığını və “SpaceX” üçün potensial hökumət müqavilələrini təhdid edir. “Tesla” siyasi qalmaqal və Çin nəhəngi “BYD”nin artan rəqabəti fonunda bazar payını itirir. “Tesla”nın tədarükləri ikinci rübdə təxminən 14% azalıb.

İyun ayında şirkət “Tesla”nın gələcəyi üçün kritik olan bir layihəyə start verib. Bu, Ostində robotaksilərin istifadəyə verilməsidir.