“Zayed İnsan Qardaşlığı” mükafatı və Bakının qlobal sülh mesajı - ŞƏRH

Azərbaycan Prezidenti İlham Əliyevin Əbu-Dabiyə səfəri və “Zayed İnsan Qardaşlığı Mükafatı”nın təqdimolunma mərasimindəki çıxışı təkcə diplomatik jest kimi deyil, həm də regionun və qlobal siyasətin aktual gündəmini əks etdirən mühüm siyasi mesajlar kontekstində diqqət çəkir. Birləşmiş Ərəb Əmirliklərinin paytaxtında keçirilən mərasim Azərbaycan-BƏƏ münasibətlərinin strateji səviyyəyə yüksəldiyini bir daha nümayiş etdirməklə yanaşı, rəsmi Bakının sülh, dialoq və multikulturalizm xəttini beynəlxalq platformada önə çıxarması baxımından da əhəmiyyətli hadisə kimi qiymətləndirilir.

Əbu-Dabi səfəri çərçivəsində Prezident İlham Əliyevin nüfuzlu “Zayed İnsan Qardaşlığı Mükafatı” ilə təltif olunması Azərbaycan rəhbərliyinə beynəlxalq səviyyədə verilən siyasi və mənəvi qiymət kimi təqdim olunur. BƏƏ-nin qurucusu Şeyx Zayed bin Sultan Al Nəhyanın adını daşıyan bu mükafatın təqdimatı, xüsusilə tolerantlıq, dinlərarası dialoq və humanizm dəyərlərinin təşviqi baxımından rəmzi məna daşıyır. Mərasimdə çıxış edən Azərbaycan Prezidenti mükafatı böyük şərəf kimi qəbul etdiyini bildirərək, bunu Azərbaycan xalqına və ölkənin yürütdüyü siyasətə verilən yüksək qiymət kimi dəyərləndirdi.

Prezident çıxışında Birləşmiş Ərəb Əmirliklərinin son onilliklərdə əldə etdiyi inkişafı, sabitlik və harmoniyanı xüsusi vurğuladı. Onun sözlərinə görə, BƏƏ bu gün Yaxın Şərqdə və qlobal miqyasda sabitlik, modernləşmə və multikultural birgəyaşayış modeli kimi seçilir. Azərbaycan rəhbəri Şeyx Zayedin irsinin təkcə BƏƏ üçün deyil, ümumilikdə region və dünya üçün sülh və əməkdaşlıq mesajı verdiyini qeyd etdi. Bu kontekstdə Bakı ilə Əbu-Dabi arasında mövcud olan sıx siyasi və iqtisadi əməkdaşlıq münasibətlərinin də ortaq dəyərlər və qarşılıqlı etimad üzərində qurulduğu vurğulandı.

Çıxışın əsas məzmununu isə regionda sülh və təhlükəsizlik məsələləri təşkil etdi. Prezident İlham Əliyev uzun illər davam edən Azərbaycan-Ermənistan münaqişəsinin artıq başa çatdığını və regionun yeni mərhələyə qədəm qoyduğunu diqqətə çatdırdı. Onun sözlərinə görə, onilliklər boyu davam edən qarşıdurmadan sonra bu gün region ölkələri sülh şəraitində yaşamağın yeni reallığını formalaşdırır. Bu proses yalnız siyasi qərarlar deyil, həm də psixoloji və sosial transformasiya tələb edən mürəkkəb mərhələ kimi təqdim edildi. Prezident qeyd etdi ki, tərəflər artıq müharibə dövründən sülh dövrünə keçidi praktik olaraq yaşayır və bu, Cənubi Qafqazın gələcək inkişafı üçün əsas şərtdir.

Dövlət başçısı çıxışında sülhün yalnız iki ölkə arasında münasibətlərin normallaşması ilə məhdudlaşmadığını, bütövlükdə region üçün strateji əhəmiyyət daşıdığını vurğuladı. Onun fikrincə, uzunmüddətli sabitlik iqtisadi əməkdaşlıq, nəqliyyat layihələri və qarşılıqlı etimadın formalaşması üçün əsas baza rolunu oynayır. Sülhün bərqərar olması Cənubi Qafqazın qlobal iqtisadi və nəqliyyat xəritəsində rolunu gücləndirə bilər. Bu baxımdan Azərbaycan rəhbərliyi regionda davamlı sabitlik və əməkdaşlıq mühitinin formalaşmasını prioritet kimi təqdim edir.

Prezident İlham Əliyevin çıxışında dialoq və qarşılıqlı hörmət məsələləri xüsusi yer tutdu. O, müxtəlif dinlərin və mədəniyyətlərin nümayəndələrinin birgəyaşayışının insan qardaşlığı ideyasının əsasını təşkil etdiyini bildirdi. Azərbaycan modeli bu baxımdan nümunə kimi təqdim edildi: Ölkədə müxtəlif etnik və dini icmaların dinc yanaşı yaşaması, multikultural dəyərlərin dövlət siyasəti səviyyəsində təşviqi xüsusi qeyd olundu. Dövlət başçısı vurğuladı ki, bu model yalnız daxili siyasətin elementi deyil, həm də Azərbaycanın beynəlxalq münasibətlərdə apardığı xəttin əsas komponentlərindən biridir.

Çıxışın digər mühüm xətti humanizm və qlobal əməkdaşlıq ideyasına həsr olundu. Prezident insan qardaşlığı anlayışının müasir dünyada daha aktual olduğunu bildirdi. Qlobal miqyasda artan geosiyasi gərginliklər, münaqişələr və humanitar böhranlar fonunda xalqlar arasında anlaşma və əməkdaşlığın gücləndirilməsi zəruri hesab olunur. Bu kontekstdə Azərbaycan rəhbərliyi dialoq və qarşılıqlı hörmətin alternativsiz olduğunu vurğulayır.

Eyni zamanda, Prezident İlham Əliyev sülh prosesinə dəstək verən beynəlxalq tərəfdaşlara təşəkkürünü ifadə etdi. O, sülh sazişinin imzalanması istiqamətində atılan addımların tarixi əhəmiyyət daşıdığını qeyd edərək, regionda uzunmüddətli sabitliyin təmin olunması üçün beynəlxalq ictimaiyyətin konstruktiv rolunun vacibliyini vurğuladı. Bu mesaj Azərbaycan diplomatiyasının sülh gündəmini beynəlxalq səviyyədə legitimləşdirmək və dəstək qazanmaq strategiyasının davamı kimi qiymətləndirilə bilər.

Ümumilikdə, Əbu-Dabidə səsləndirilən çıxışın əsas mesajı ondan ibarət idi ki, uzun illər davam edən münaqişələrdən sonra sülh və əməkdaşlıq mümkündür və bu, yalnız regional deyil, qlobal əhəmiyyət daşıyır. Prezident İlham Əliyev insan qardaşlığı, dialoq və qarşılıqlı hörmət prinsiplərinin XXI əsrin beynəlxalq münasibətlər sistemində əsas istiqamət olmalı olduğunu vurğuladı.

Beləliklə, Əbu-Dabi səfəri və “Zayed İnsan Qardaşlığı Mükafatı”nın təqdimatı Azərbaycan diplomatiyasının beynəlxalq platformada mövqelərinin güclənməsi, sülh gündəliyinin təşviqi və Bakı ilə Əbu-Dabi arasında strateji tərəfdaşlığın dərinləşməsi baxımından simvolik və siyasi əhəmiyyət daşıyan hadisə kimi qiymətləndirilir. Bu çıxış həm regionda post-münaqişə reallıqlarının təqdimatı, həm də qlobal miqyasda humanizm və birgəyaşayış ideyasının təşviqi baxımından diqqətəlayiq siyasi mesajlar toplusu kimi yadda qalır.

Hikmət Həsənov