Azərbaycan-NATO əməkdaşlığı yeni mərhələdə - ŞƏRH

Azərbaycan Respublikası ilə NATO arasında əməkdaşlığın təməli 1992-ci ilin mart ayında qoyulub. 1997-ci ildə Azərbaycan Avro-Atlantik Tərəfdaşlıq Şurası kimi tanınan Şimali Atlantik Əməkdaşlıq Şurasının məşvərət forumuna daxil olub. 4 may 1994-cü il tarixində Azərbaycan Respublikası NATO-nun “Sülh Naminə Tərəfdaşlıq” (SNT) Proqramına qoşulub.

2002-ci ildən etibarən “Tərəfdaşlığın Qərargah Vəzifələri” Konsepsiyası çərçivəsində Azərbaycan Ordusunun zabitləri NATO-nun müxtəlif taktiki, əməliyyat və strateji səviyyəli qərargahlarında xidmətə başlayıblar. 2008-ci ildən etibarən təhsil sahəsində NATO ilə əməkdaşlıq edən Azərbaycan Ordusu NATO-nun Müdafiə Təhsilinin Genişləndirilməsi Proqramından yararlanmaqla tabeliyində olan xüsusi təyinatlı hərbi təhsil müəssisələrinin tədrisinin məzmun və formasının Avropa təhsil standartlarına və Boloniya prosesinə uyğunlaşdırılması, eləcə də pedaqoji kadrların təkmilləşdirilməsi sahəsində ciddi işlər görüb. Əməkdaşlıq çərçivəsində bir sıra görüşlər keçirilir, müxtəlif məsələlər müzakirə edilir.

Avqustun 21-də Azərbaycanın Quru Qoşunlarının hərbi hissələrindən birində ölkənin Müdafiə Nazirliyi və NATO nümayəndə heyətinin nümayəndələrinin iştirakı ilə növbəti ekspert iclası keçirilib. Azərbaycan Müdafiə Nazirliyi qeyd edib ki, görüş Azərbaycan Müdafiə Nazirliyi ilə NATO arasında 2025-ci il üçün Fərdi Tərəfdaşlıq Əməkdaşlıq Proqramına uyğun olaraq keçirilib. Tərəflər Azərbaycan ilə NATO arasında Əməliyyat İmkanları Konsepsiyası proqramı çərçivəsində əməkdaşlığın hazırkı vəziyyətini təhlil edib, qarşılıqlı fəaliyyətin perspektiv məsələləri ətrafında fikir mübadiləsi aparıblar. Qeyd edək ki, bundan əvvəl sözügedən “NATO Əməkdaşlıq Proqramı” çərçivəsində NATO Hərbi Hava Qüvvələri Komandanlığının mobil təlim qrupu Azərbaycan Hərbi Hava Qüvvələrinin şəxsi heyəti üçün “Hava əməliyyatlarının planlaşdırılması və aparılması” mövzusunda təlim kursu keçirib. Kursun məqsədi NATO-nun Əməliyyat İmkanları Konsepsiyası proqramı çərçivəsində NATO-nun hava məkanının idarə edilməsi, özünüqiymətləndirmə və təyyarə heyətlərinin qiymətləndirilməsinin əsas prinsiplərini izah etmək, həmçinin tələbələrin ixtisasları üzrə nəzəri və praktiki bacarıqlarını təkmilləşdirmək olub.

2025-ci ilin dekabrında Bakıda NATO-nun himayəsi altında “Müdafiə və təhlükəsizlik sektorunun islahatlarına mühüm töhfə verən təcrübələr və qabaqcıl təcrübələr” mövzusunda multidissiplinar elmi konfransın keçirilməsi planlaşdırılır.

Son zamanlar Azərbaycan NATO ilə və ilk növbədə Türkiyə ilə multidissiplinli hərbi əməkdaşlığı sistemli şəkildə artırır. Qarşılıqlı fəaliyyətin əsas istiqaməti Azərbaycan silahlı qüvvələrinin NATO standartlarına keçməsidir. Türkiyə və NATO-nun təlimatçı və müşavirlərinin köməkliyi ilə Azərbaycan Müdafiə Nazirliyinin müxtəlif bölmələrinin, o cümlədən “Komandos” xüsusi təyinatlılarının yenidən təlimi həyata keçirilir. Azərbaycan ordusunun zabitlərinin NATO proqramları üzrə hazırlığı daimi əsasda təşkil olunur. Şimali Atlantika Alyansının nümayəndələri ilə NATO strukturlarının iştirakı fonunda Azərbaycan donanmasının inkişafı məsələləri müzakirə edilir.

Bütün bu sadalananlar Azərbaycanın qüdrətini, özünü müdafiə qabiliyyətini artırmasına, regionun güclü dövləti olmaqla yanaşı, dünyada da söz sahibi olmasına dəstək verir.

Hikmət Həsənov