Ramazanda sağlam qalmağın açarı

Ramazan ayı təkcə mənəvi saflaşma deyil, həm də bədən üçün bir sınaq dövrüdür. Uzun saatlar ac və susuz qalmaq orqanizmin enerji, maye və mineral balansına təsir göstərə bilər. Ancaq mütəxəssislər bildirirlər ki, düzgün qurulmuş qidalanma planı ilə bu ayı həm rahat, həm də sağlam keçirmək mümkündür.

Təhlil.az xəbər verir ki, həkimlərin sözlərinə görə, yemək sayının azalması və yuxu rejiminin dəyişməsi gün ərzində halsızlıq, baş ağrısı, diqqətin zəifləməsi kimi hallara səbəb ola bilər. Bu riskləri minimuma endirməyin yolu isə balanslı və şüurlu qidalanmadır.

Sahur Ramazanın ən vacib mərhələsidir. Onu buraxmaq oruc müddətini daha ağırlaşdırır və gün ərzində yorğunluq riskini artırır. Sahur süfrəsində zülalla zəngin qidalar – yumurta, qatıq, pendir, paxlalılar üstünlük təşkil etməlidir. Lifli məhsullar, tam taxıllar, yulaf, kəpəkli çörək uzun müddət toxluq hissi yaradır və enerjinin stabil qalmasına kömək edir. Təzə tərəvəz və göyərtilər isə həm vitamin balansını qoruyur, həm də həzmi asanlaşdırır.

İftar zamanı isə ən çox edilən səhv uzunmüddətli aclıqdan sonra həddindən artıq yağlı və şəkərli qidalara yönəlməkdir. Bu, mədə-bağırsaq sistemində narahatlıq və həzm problemlərinə səbəb ola bilər. Mütəxəssislər orucu yüngül və balanslı qidalarla açmağı, qızardılmış və çox şirniyyatlı məhsullardan uzaq durmağı tövsiyə edirlər. Yeməyi tədricən və porsiyalara bölərək qəbul etmək həm həzmi asanlaşdırır, həm də orqanizmin qəfil yüklənməsinin qarşısını alır.

Maye qəbulu Ramazanda xüsusi əhəmiyyət daşıyır. İftarla sahur arasında kifayət qədər su içmək vacibdir. Meyvə və tərəvəzlərin yüksək su tərkibi də bədənin maye balansını qorumağa kömək edir. Qazlı və həddindən artıq şirin içkilər əvəzinə su və ya şəkərsiz kompotlara üstünlük verilməsi daha sağlam seçimdir.

Ramazan ayında düzgün qidalanma həm ibadətin rahat icrasına, həm də sağlamlığın qorunmasına xidmət edir. Ölçülü porsiyalar, keyfiyyətli qida seçimi və kifayət qədər su -bu üç amil ay boyunca enerjili və sağlam qalmağın əsas şərtləridir.