Cenevrədə ABŞ-İran və Rusiya-Ukrayna münasibətləri ətrafında müzakirələr aparılacaq

Fevralın 17-də dünya diplomatiyasının diqqəti yenidən Cenevrəyə yönələcək. Olduqca gərgin keçəcəyi gözlənilən bu gündə ABŞ-nin təşəbbüsü ilə həm İran, həm də Ukrayna böhranı ətrafında taleyüklü müzakirələr aparılacaq.

Təhlil.az xəbər verir ki, günün ilk saatlarında masada ABŞ və İran münasibətləri olacaq. Amerikalı nümayəndələr Uitkoff və Kuşner, iranlı həmkarları ilə qarşı-qarşıya gələrək illərdir davam edən soyuq münasibətlərdə çıxış yolu axtaracaqlar. Bu həssas dialoqda Oman tərəfi öz ənənəvi vasitəçilik missiyasını yerinə yetirərək tərəflər arasında körpü rolunu oynayacaq.

Lakin Cenevrədəki diplomatik trafik bununla yekunlaşmayacaq. Günün ikinci yarısında Uitkoff və Kuşner daha çətin bir missiya üçün masaya oturacaqlar. Bu dəfə onlar Rusiya və Ukrayna nümayəndələri ilə üçtərəfli formatda bir araya gələrək, Avropanın gələcək təhlükəsizlik arxitekturasını və davam edən müharibənin nizamlanma perspektivlərini müzakirə edəcəklər. Mənbələr bu görüşlərin həm Yaxın Şərq, həm də Şərqi Avropadakı gərginliyi azaltmaq üçün mühüm bir sınaq olacağını vurğulayırlar.