Neqativ düşüncə beynə necə zərər verir?

Alimlərin son araşdırmaları göstərir ki, uzun müddət neqativ düşüncələrə köklənmək təkcə əhval-ruhiyyəni deyil, beynin özünü də zədələyə bilər. Mütəxəssislərin fikrincə, davamlı pessimizm demensiya (ağıl zəifliyi) riskini artıran əsas psixoloji amillərdən biri hesab olunur.

Təhlil.az xəbər verir ki, araşdırmalara əsasən, sağlam beyin normal şəraitdə düşüncəni balansda saxlamağa, mümkün qədər optimist və stabil istiqamətə yönəltməyə çalışır. Lakin insan qəsdən və uzun müddət mənfi fikirlərə qapıldıqda, orqanizmdə kortizol adlı stress hormonunun səviyyəsi yüksəlir.

Alimlər bildirirlər ki, kortizolun uzunmüddətli artımı neyronlara zərər verə, beynin informasiya emalı və yaddaşla bağlı funksiyalarını zəiflədə bilər. Bu proses idrak (kognitiv) qabiliyyətlərin tədricən azalmasına və beynin “daxildən köhnəlməsi”nə yol açır.

Mütəxəssislərin sözlərinə görə, insan nə qədər çox neqativ ssenarilər üzərində düşünürsə, beyin bir o qədər yorulur, zəifləyir və erkən yaşlanma riski artır. Bu, xüsusilə uzunmüddətli stress, narahatlıq və depressiya hallarının müşayiət olunduğu şəxslərdə daha qabarıq müşahidə olunur.

 Yaxşı xəbər isə budur ki, beyin dəyişkəndir. Müsbət düşüncə, stressin idarə olunması, fiziki aktivlik və sosial əlaqələr kortizol səviyyəsini azaltmağa, beynin özünü bərpa mexanizmlərini gücləndirməyə kömək edir.

Alimlər vurğulayırlar ki, beyin yalnız düşündüklərimizi deyil, necə düşündüyümüzü də yadda saxlayır.

Yəni düşüncə tərzi sadəcə psixoloji seçim deyil, beyin sağlamlığı üçün strateji qərardır.