BMT Azərbaycana dair iqtisadi artım proqnozunu açıqlayıb

Birləşmiş Millətlər Təşkilatının (BMT) son qiymətləndirməsinə görə, Azərbaycanda iqtisadi artım yaxın iki ildə mülayim templə davam edəcək. Təhlil.az xəbər verir ki, təşkilat 2026-cı ildə ölkə iqtisadiyyatının 2,7 %, 2027-ci ildə isə 2,6 % artacağını proqnozlaşdırır.

BMT-nin hesabatında qeyd olunur ki, 2025-ci ildə Azərbaycanda iqtisadi artım 1,6 % səviyyəsində qeydə alınıb. 2026-cı ildə isə artımın sürətlənməsi əsasən təbii qaz hasilatı və ixracının genişlənməsi, eləcə də qeyri-neft-qaz sektorunda davamlı inkişaf hesabına mümkün olacaq.

Milli proqnozlar isə daha nikbindir. Azərbaycan İqtisadiyyat Nazirliyi 2026-cı ildə ÜDM-in 2,9 %, 2027-ci ildə isə 3,3 % artacağını gözləyir.

Beynəlxalq maliyyə institutlarının və reytinq agentliklərinin qiymətləndirmələri arasında isə müəyyən fərqlər var. S&P Global 2026-cı il üçün 2 %, Fitch Ratings və Moody's isə 2,5 % iqtisadi artım proqnozlaşdırır.

Eyni zamanda, Asiya İnkişaf Bankı Azərbaycanda 2026-cı ildə 2 %, Avropa Yenidənqurma və İnkişaf Bankı 2,5 %, Dünya Bankı isə 2,4 % iqtisadi artım gözləyir.

Ümumilikdə proqnozlar göstərir ki, Azərbaycan iqtisadiyyatı enerji sektoru və qeyri-neft sahələrinin dəstəyi ilə sabit, lakin ehtiyatlı artım trayektoriyasında qalacaq.