Papoyan: "Azərbaycan yanacağı Ermənistanda qiymətləri endirəcək"

Ermənistanın iqtisadiyyat naziri Gevorg Papoyan Azərbaycandan yeni neft məhsulları partiyasının daxil olması fonunda ölkədə benzin qiymətlərinin ucuzlaşacağını açıqlayıb.

Təhlil.az xəbər verir ki, 2025-ci ildə Azərbaycanın ərazisi vasitəsilə Ermənistana dəmir yolu ilə ümumilikdə 6 580 ton taxıl daşınıb. Bunun 1 000 tonu Qazaxıstan, 5 580 tonu isə Rusiya mənşəli olub. Həmin dövrdə Ermənistana 1 210 ton Azərbaycan benzini də çatdırılıb.

2026-cı il yanvarın 8-nə olan məlumata əsasən, Azərbaycan ərazisi üzərindən Ermənistana 8 485 ton Rusiya taxılı artıq daxil olub, 4 103 ton taxıl isə yoldadır. Eyni zamanda, 7 600 ton Azərbaycan neft məhsulu, o cümlədən 6 100 ton benzin və 1 500 ton dizel yanacağı Ermənistana çatdırılmaq üzrədir.

Gevorg Papoyan bildirib ki, bu tədarüklərin nəticəsi olaraq benzin və dizel yanacağının qiymətinin əvvəlki ayla müqayisədə 80 dram/litrə (təxminən 21 qəpik) enməsi gözlənilir. Nazir əlavə edib ki, neft məhsullarının satışı ilə məşğul olan digər şirkətlər də qiymətlərin aşağı salınması istiqamətində addımlar atırlar.