Bu gün Milli Qəhrəman Polad Həşimovun doğum günüdür

Bu gün Azərbaycanın Milli Qəhrəmanı, şəhid general-mayor Polad Həşimovun doğum günüdür.

Təhlil.az xəbər verir ki, Qəhrəman zabitin anadan olmasından 51 il keçir. Bu tarix təkcə bir ömür yolunun başlanğıcı deyil, həm də Azərbaycan hərb tarixində ləyaqət, fədakarlıq və Vətənə sədaqət anlayışlarının simvoluna çevrilmiş bir şəxsiyyətin xatırlanması günüdür.

Polad Həşimov 1975-ci il yanvarın 2-də Qəbələ rayonunun Vəndam kəndində dünyaya göz açıb. Ailəsi ilə birlikdə Sumqayıt şəhərinə köçdükdən sonra burada orta təhsil alıb. Gənc yaşlarından hərbi peşəyə maraq göstərən Polad Həşimov bu yolu şüurlu şəkildə seçərək indiki Heydər Əliyev adına Azərbaycan Ali Hərbi Məktəbinə daxil olub və təhsilini uğurla başa vurub.

Xidmətə taqım komandiri kimi başlayan Polad Həşimov illər ərzində peşəkarlığı, prinsipiallığı və şəxsi nümunəsi ilə seçilərək general-mayor ali hərbi rütbəsinədək yüksəlib. O, müxtəlif cəbhə bölgələrində xidmət edib, qarşıya qoyulan tapşırıqların icrasında daim ön cərgədə olub və şəxsi heyətin hörmətini qazanıb.

2016-cı ilin Aprel döyüşləri zamanı Azərbaycan Ordusunun mövqelərinin qorunmasında və döyüş tapşırıqlarının yerinə yetirilməsində xüsusi fərqlənən Polad Həşimov Prezident İlham Əliyevin 20 aprel 2016-cı il tarixli Sərəncamına əsasən 3-cü dərəcəli “Vətənə xidmətə görə” ordeni ilə təltif olunub. 2019-cu il iyunun 24-də isə ona general-mayor ali hərbi rütbəsi verilib.

Polad Həşimov 2020-ci il iyulun 14-də Azərbaycan–Ermənistan dövlət sərhədinin Tovuz rayonu istiqamətində düşmən təxribatlarının qarşısını alarkən qəhrəmancasına şəhid olub. Onun ölümü Azərbaycan cəmiyyətində dərin sarsıntı ilə yanaşı, böyük milli həmrəylik dalğası yaradıb. Azərbaycan Prezidentinin 2020-ci il 9 dekabr tarixli Sərəncamı ilə Polad Həşimov ölümündən sonra “Azərbaycanın Milli Qəhrəmanı” fəxri adına layiq görülüb.

Bu gün Polad Həşimovun adı Azərbaycan xalqının yaddaşında rütbəsi ilə deyil, Vətən qarşısında məsuliyyət anlayışı, əsgərinə bağlılığı və sonadək ön xətdə olmağı ilə yaşayır. Onun ömür yolu müasir Azərbaycan zabitinin necə olmalı olduğunu göstərən canlı nümunə kimi tarixə yazılıb.