Yaponiyada xərçənglə bağlı ümidverici araşdırma

Xərçənglə mübarizədə qeyri-adi, amma ümidverici bir istiqamət ortaya çıxıb.

Təhlil.az xəbər verir ki, yapon alimlərinin apardığı yeni araşdırma göstərir ki, Yapon ağac qurbağasının bağırsağında yaşayan bir bakteriya şişlərin inkişafını dayandıra, hətta onları tamamilə aradan qaldıra bilər.

Tədqiqat Yaponiya Qabaqcıl Elm və Texnologiya İnstitutu alimləri tərəfindən aparılıb. Araşdırma zamanı qurbağanın bağırsaq mikroflorasında rast gəlinən Ewingella americana adlı bakteriyanın xərçəng hüceyrələrinə qarşı güclü təsir göstərdiyi müəyyən edilib.

Eksperimentlərdə bu bakteriyanın yalnız bir dozası laboratoriya siçanlarında şişlərin nəzərəçarpacaq dərəcədə kiçilməsinə, bəzi hallarda isə tamamilə yox olmasına səbəb olub. Daha maraqlısı isə odur ki, sonradan yenidən xərçəng hüceyrələri yeridilsə belə, şişlərin yenidən formalaşmadığı müşahidə edilib.

Alimlərin sözlərinə görə, bakteriya şişlərə qarşı iki fərqli mexanizm vasitəsilə təsir göstərir və bu baxımdan bəzi mövcud müalicə üsullarından daha effektiv nəticə verir. Bununla yanaşı, mütəxəssislər ehtiyatı əldən vermir: metodun insanlar üzərində tətbiqi üçün hələ geniş və uzunmüddətli tədqiqatlara ehtiyac var.

Elm dünyasında maraq doğuran bu tapıntı xərçəng müalicəsində tamamilə yeni bioloji yanaşmaların mümkünlüyünü gündəmə gətirir. Görünür, bəzən ən böyük elmi ipucları gözlənilməz yerlərdən, hətta bir qurbağanın bağırsağından belə çıxa bilir.