Tailandla sərhəddə gərginlik: 630 mindən çox kambocalı evlərini tərk edib

Kambocanın daxili işlər nazirliyi bildirib ki, sərhəddə Tailandla qarşıdurmanın kəskinləşməsi səbəbindən ölkədə 630 mindən çox mülki vətəndaş evlərini tərk etməyə məcbur olub. Onların əksəriyyətini qadınlar və uşaqlar təşkil edir.

Təhlil.az xəbər verir ki, nazirliyin məlumatına görə, evlərini tərk edən 636,6 mindən çox kambocalı arasında 534,3 mindən çox qadın və uşaq var.

Kambocanın müdafiə nazirliyinin son məlumatına əsasən, atəş nəticəsində 31 mülki şəxs həyatını itirib, ən azı 87 nəfər isə yaralanıb. Dekabr ayının əvvəllərindən bəri sərhəd bölgəsində baş verən eskalasiya zamanı 125 yaşayış evi, bir neçə dini obyekt və şəhər-düyün infrastrukturu zədələnib.

Kamboca-Tailand sərhədində odlu silahların istifadə olunduğu toqquşmalar 7 dekabrda başlayıb. Tailand Quru Qoşunları 8 dekabrda açıqlayıb ki, kambocalı hərbçilər sərhəd bölgəsində Tailand mövqelərini artilleriya atəşinə tutublar. Tailand Hərbi Hava Qüvvələri isə cavab olaraq Kambocanın hərbi infrastrukturuna zərbələr endirib.