Bir stəkan limonlu su bədəni necə dəyişir? - ARAŞDIRMA

Hər gün limon suyu içmək sadə görünsə də, bu vərdiş orqanizmdə bir sıra müsbət dəyişikliklərə səbəb ola bilər.

Təhlil.az xəbər verir ki, limon suyu gündəlik qəbul edildikdə immun sisteminin güclənməsinə kömək edir.

C vitamini ilə zəngin olması bədənin infeksiyalara qarşı müqavimətini artırır, soyuqdəymə və qrip riskini azalda bilər. Xüsusilə mövsüm dəyişikliklərində limonlu su immun dəstək kimi faydalı hesab olunur.

Limon suyunun həzm sisteminə də müsbət təsiri var. Səhərlər acqarına ilıq limon suyu içmək mədə turşusunun balansını qorumağa, qəbizliyin azalmasına və həzm prosesinin sürətlənməsinə yardımçı ola bilər. Bu vərdiş qaraciyərin fəaliyyətini də dəstəkləyir, toksinlərin bədəndən atılmasını asanlaşdıra bilər.

Antioksidant xüsusiyyətləri sayəsində limon suyu dərinin sağlam görünməsinə də töhfə verir. Dərinin daha parlaq olması, sızanaqların azalması və erkən qocalma əlamətlərinin ləngiməsi bu vərdişlə əlaqələndirilir.

Eyni zamanda limon suyu maddələr mübadiləsini sürətləndirərək arıqlama prosesinə də dəstək ola bilər. Toxluq hissi yaratdığı üçün gün ərzində daha az kalori qəbuluna kömək etdiyi bildirilir.

Limonun tərkibindəki sitrat maddəsi bəzi növ böyrək daşlarının yaranma riskini azalda bilər. Bundan əlavə, su ilə birlikdə qəbul edildiyi üçün bədənin su balansını qoruyur və xüsusilə səhərlər daha enerjili hiss etməyə şərait yaradır.

Bununla belə, limon suyundan istifadə edərkən diqqətli olmaq lazımdır.

Tez-tez qəbul edildikdə diş minasına zərər verə bilər, buna görə içdikdən sonra ağzı su ilə yaxalamaq məsləhətdir. Mədə turşuluğu, qastrit və reflü problemi olan şəxslər isə limon suyunu ehtiyatla istifadə etməlidirlər.

Hər şeydə olduğu kimi, limon suyunda da ölçü vacibdir. Həddindən artıq istifadə faydadan çox zərər verə bilər.