Overçuk: Ermənistan seçim etmək məcburiyyətində qalacaq

Ermənistan Avropa İttifaqı və Avrasiya İqtisadi Birliyi (AİB) arasında seçim etmək məcburiyyətində qalacaq. Rusiya Baş nazirinin müavini Aleksey Overçuk bildirib ki, eyni vaxtda hər iki assosiasiyanın üzvü olmaq mümkün deyil.

Təhlil.az-ın məlumatına görə, Baş nazirin müavini qeyd edib: “Ermənistanın Avropa İttifaqı ilə yaxınlaşması ilə bağlı biz dəfələrlə danışmışıq və hesab edirik ki, iki inteqrasiya birliyinə üzvlük uyğun deyil. Müəyyən bir məqamda Ermənistan xalqı düzgün seçim etməli olacaq”.

Overçuk həmçinin bildirib ki, bu il Ermənistanla Rusiya arasında ticarət əhəmiyyətli dərəcədə azalıb. Onun sözlərinə görə, Rusiya biznesi Ermənistana ehtiyatla baxmağa başlayıb.

"İqtisadi sahədə Rusiya ilə Ermənistan arasında ticarət bu il qarşılıqlı ticarət baxımından azalıb. Xatırladığınız kimi, ötən il ölkələrimiz arasında ticarət 12,4 milyard dollar təşkil edib. Bu il isə açıq-aydın təxminən 6 milyard dollar olacaq. Bu, çox əhəmiyyətli bir azalmadır", - Baş nazirin müavini vurğulayıb.