Peskov: SSRİ-ni bərpa etmək mümkün deyil və Putinin bunu etmək istəyi yoxdur

Rusiya Prezidenti Vladimir Putinin Sovet İttifaqını bərpa etmək niyyəti yoxdur. Bu, geosiyasi cəhətdən mümkün deyil.

Təhlil.az xəbər verir ki, bu barədə Rusiya liderinin mətbuat katibi Dmitri Peskov Almaniya kansleri Fridrix Mertsin NATO ölkələrinin artan hərbiləşdirilməsini Rusiya prezidentinin Sovet İttifaqını bərpa etmək arzusu ilə əlaqələndirən açıqlamasına münasibət bildirərkən deyib.

"Bu, doğru deyil" - Peskov bildirib. "Vladimir Putin SSRİ-ni bərpa etmək istəmir, çünki bu, mümkün deyil. O özü də bunu dəfələrlə deyib. Bu barədə danışmaq, daha inkişaf etmiş inteqrasiya formalarında MDB-dəki tərəfdaşlarımıza, müttəfiqlərimizə hörmətsizlik göstərmək deməkdir. Görünür, cənab Merts bundan xəbərsizdir", - deyə Kremlin sözçüsü əlavə edib. O, həmçinin Mertsin Rusiyanın NATO-ya hücum etməyə hazırlaşdığı barədə digər iddiasını "tamamilə cəfəngiyat" adlandırıb.