Vaşinqton ABŞ-yə girişlə bağlı yeni qaydalar tətbiq edə bilər

ABŞ-yə giriş 30-dan çox ölkənin vətəndaşı üçün qadağan oluna və ya məhdudlaşdırıla bilər.

Təhlil.az xəbər verir ki, bu barədə ABŞ-nin daxili təhlükəsizlik naziri Kristi Noem “Fox News” telekanalının efirində bildirib.

“Dəqiq sayı deməyəcəm, amma 30-dan çoxdur. Əgər həmin ölkələrdə sabit hökumət yoxdursa, əgər onlar bizə ABŞ-yə daxil olmaq istəyən insanların kim olduğunu və onların yoxlanmasına necə kömək edə biləcəklərini izah edə bilmirlərsə, onda niyə biz həmin ölkələrin vətəndaşlarını Amerika Birləşmiş Ştatlarına buraxmalıyıq?” - deyə o bildirib.

Yerli medianın məlumatına görə, Vaşinqton ABŞ-yə girişin qadağan edildiyi və ya məhdudlaşdırıldığı ölkələrin siyahısını 19-dan 32-yə qədər genişləndirməyi nəzərdən keçirir.

Bundan əvvəl K.Noem vətəndaşları milli təhlükəsizlik üçün daha çox təhdid yaradan ölkələrə ABŞ-yə tam giriş qadağasının tətbiq edilməsini təklif etmişdi. Bu açıqlamalar ötən həftə ABŞ Milli Qvardiyasının hərbçilərinə edilən hücumdan sonra səsləndirilmişdi.