Azərbaycan ÜDM həcminə görə Cənubi Qafqazda liderdir

Media Təhlil Mərkəzinin (MTM) Dövlət Statistika Komitəsinin rəsmi məlumatları əsasında apardığı təhlilə görə, son 5 ilin yanvar-mart aylarında ən yüksək Ümumi Daxili Məhsul (ÜDM) istehsalı 2023-cü ildə 30,31 milyard manat təşkil edib. Ən aşağı göstərici isə “COVID-19” pandemiyasına görə 2021-ci ildə qeydə alınıb və həmin il ÜDM istehsalı 18,92 milyard manat olub.

2025-ci ilin I rübündə Azərbaycanda ÜDM həcmi ötən ilin eyni dövrü ilə müqayisədə 2,7% və ya 796,1 milyon manat artaraq 29,89 milyard manata çatıb. Xatırladaq ki, ötən ilin I rübündə bu məbləğ 29,1 milyard manata bərabər olub və bu, 2023-cü ilin eyni dövrünə nisbətən 4% və ya 1,21 milyard manat az deməkdir.

Cari ilin I rübünə olan rəsmi rəqəmlərə əsasən, Azərbaycanda adambaşına düşən ÜDM həcmi 2 922,2 manat təşkil edir. Bu, ötən ilin eyni dövrünə nisbətən 2,3% və ya 65,7 manat çoxdur.

Qeyd edək ki, bu göstərici üzrə son 5 ilin ən yüksək rəqəmi 2023-cü ilin I rübündə qeydə alınıb. Həmin tarixdə ölkədə adambaşına düşən ÜDM həcmi 2 991,2 manat olub.

2025-ci ilin yanvar-mart aylarında istehsal olunan ÜDM həcminin 67,25%-i və ya 20,1 milyard manatı qeyri-neft-qaz sektoru hesabına formalaşıb. Ötən ilin I rübündə isə qeyri-neft-qaz sektorunun Ümumi Daxili Məhsul istehsalında payı 64,26% və ya 18,7 milyard manat təşkil edib.

Cənubi Qafqaz ölkələrinin Dövlət Statistika Komitələrinin açıqladığı rəsmi məlumatlara əsasən, 2024-cü ildə hər üç ölkə üzrə ÜDM həcmi artıb. Bu artım Azərbaycanda 2,7% və ya 1,96 milyard dollar, Gürcüstanda 9,7% və ya 2,99 milyard dollar, Ermənistanda isə 7% və ya 1,7 milyard dollar olub.

Daha dəqiq desək, 2024-cü ildə Azərbaycanda ÜDM həcmi 74,32 milyard dollar təşkil edib ki, bu, Gürcüstanın göstəricisindən 2,2 dəfə, Ermənistanın göstəricisindən isə 2,9 dəfə çox deməkdir.