Hindistan kosmosda data mərkəzləri yaratmağı planlaşdırır

Hindistanın kosmik proqramı raket və orbit missiyalarından kənara çıxaraq daha az nəzərə çarpan, lakin strateji əhəmiyyətli bir sahəyə — kosmosda məlumatların emalına yönəlir.

Təhlil.az "The Times of India" nəşrinin məlumatına istinadla xəbər verir ki, Hindistanın Kosmik İşlər Departamenti (DoS) təsdiqləyib ki, Hindistan Kosmik Tədqiqatlar Təşkilatı (ISRO) orbitdə fiziki data mərkəzlərinin yaradılması imkanlarını araşdırır. Bu mərkəzlər peyk və rabitə məlumatlarının birbaşa kosmosda emalı və saxlanması üçün nəzərdə tutulur.

Hazırda peyklərin əksəriyyəti əsasən məlumat toplayıcı rolunu oynayır. Orbitdə toplanan görüntülər, siqnallar və ölçmələr Yerüstü stansiyalara ötürülür, emal, analiz və saxlanma mərhələləri isə məhz orada həyata keçirilir. Bu model işlək olsa da, bir sıra məhdudiyyətlər yaradır. Məlumat ötürülməsi üçün zolaq genişliyi məhduddur, əlaqə pəncərələri qısadır və zamana həssas tətbiqlər gecikmələrlə üzləşə bilər.

ISRO-nun apardığı tədqiqatlar alternativ yanaşmanı önə çıxarır. Peyklərin bortunda məlumatların emalı və saxlanması imkanları yaradılarsa, Yerə yalnız zəruri və artıq emal olunmuş informasiyanın ötürülməsi kifayət edər. Bu isə həm vaxt itkilərini azaldar, həm də rabitə resurslarından daha səmərəli istifadə etməyə imkan verər.

İlkin qiymətləndirmələr göstərir ki, kosmosda kənar (edge) hesablama infrastrukturunun prototipinin yaradılması texniki baxımdan mümkündür. Məlumata görə, bu istiqamətdə sistemin hazırlanması üzərində artıq işlər aparılır.