Türkiyə və İran xarici işlər nazirləri Tehranda danışıqlar aparıblar

Türkiyənin xarici işlər naziri Hakan Fidan Tehranda İran xarici işlər naziri Abbas Əraqçi ilə görüşüb. Tərəflər ikitərəfli münasibətlərin inkişafı, regional vəziyyət və əsas beynəlxalq məsələləri müzakirə ediblər.

Təhlil.az xəbər verir ki, Əraqçi Türkiyə və İranı "dost və qardaş ölkələr" adlandırıb və sərhədlərinin "sülh və dostluq sərhədi" olaraq qaldığını vurğulayıb. O, artan ticarət əməkdaşlığını, Vanda İranın baş konsulluğunun açılması planlarını və Ankara ilə qaz müqaviləsinin uzadılması niyyətini açıqlayıb. Nazir həmçinin iki ölkənin dəmir yollarını birləşdirəcək layihənin əhəmiyyətini qeyd edib.

Fidan öz növbəsində qaz və elektrik enerjisi sektorlarında əməkdaşlığı dərinləşdirmək planlarını açıqlayıb. Prezidentlərin iştirakı ilə tezliklə Tehranda Yüksək Səviyyəli Əməkdaşlıq Şurasının iclasının keçirilməsi gözlənilir. Nazirlər həmçinin Rusiya və Ukraynadakı vəziyyətlə bağlı fikir mübadiləsi aparıblar və Ankara sülhə nail olmağa yönəlmiş istənilən təşəbbüsü dəstəkləyib.