Kiyev yenidən hədəfdə: yaralananların sayı 16-ya çatıb

Rusiyanın gecə saatlarında Kiyevə və Kiyev vilayətinə təşkil etdiyi hücum nəticəsində biri uşaq olmaqla onlarla nəfər yaralanıb, ən azı iki nəfər həlak olub.

Təhlil.az xəbər verir ki, yerli hakimiyyət orqanlarının açıqlamalarına görə, hücum pilotsuz uçuş aparatları və ballistik raketlərdən istifadə etməklə həyata keçirilib.

Xilasedici qüvvələr müxtəlif ərazilərdə dağıntılar altında qalan 8 nəfəri xilas etməyə müvəffəq olublar. Zərbələr şəhərin bir neçə yaşayış rayonunda ciddi dağıntı və yanğınlarla nəticələnib.

Kiyevin Şevçenkovski rayonunda 14 mərtəbəli binaya zərbə nəticəsində yanğın yaranıb və 1 nəfər xəsarət alıb. Solomenski rayonunda 25 və 17 mərtəbəli binalar zədələnib, 2 nəfərin yaralandığı bildirilir. Svyatoşinski rayonunda 3 mərtəbəli binaya PUA zərbəsi nəticəsində 1 nəfər həlak olub, bir uşaq xilas edilib, fərdi evdə yanğın qeydə alınıb.

Dneprovski rayonunda 10 mərtəbəli yaşayış binası qismən dağılıb, 3 nəfər xilas edilib. Darnitski rayonunda 9 mərtəbəli binanın yaxınlığına raketin düşməsi yanğına səbəb olub – nəticədə 1 nəfər həlak olub, 6 nəfər yaralanıb. Hücum yaxınlıqdakı avtomobillərə də ciddi ziyan vurub. Obolonski və Qoloseyevski rayonlarında fərdi evlər və qarajlarda yanğın hadisələri qeydə alınıb.

Hücum paytaxtın infrastrukturuna da təsirsiz ötüşməyib. Kiyev meri Vitali Kliçko bildirib ki, şəhərin qərb hissəsi elektrik enerjisiz qalıb və enerji təchizatı üzərində bərpa işləri davam edir. Onun sözlərinə görə, PUA qalıqlarının düşdüyü bir neçə ərazidə əlavə yanğınlar da baş verib.

Mer əvvəlcə Kiyevdə xəsarət alanların sayının 13 nəfər olduğunu, onlardan 6 nəfərin xəstəxanaya yerləşdirildiyini, bir nəfərin isə həlak olduğunu açıqlayıb. Lakin Kiyev Şəhər Hərbi Administrasiyası daha sonra hücum nəticəsində iki nəfərin öldüyünü, 13 nəfərin yaralandığını, onlardan birinin uşaq olduğunu bildirib.

Kiyev vilayətində də zərər qeydə alınıb. Vilayət administrasiyasının rəhbəri Nikolay Kalaşnik, Brovar rayonunda çoxmərtəbəli və fərdi yaşayış evlərinin zədələndiyini, burada iki nəfərin yaralandığını açıqlayıb.

Ukrayna Hərbi Hava Qüvvələrinin məlumatına görə, 29 noyabr gecəsi Rusiya Kiyev və bir neçə vilayəti PUA-lar və ballistik raketlərdən istifadə etməklə kombinə edilmiş hücuma məruz qoyub.

Hazırda dağıntıların aradan qaldırılması, yanğınların söndürülməsi və enerji təchizatının bərpası istiqamətində işlər davam etdirilir.