Çində bloqerlər və onlayn platformalara nəzarət daha da sərtləşdirilir

Çin Xalq Respublikasının Sədri Si Cinpin ölkədə internetin idarə edilməsi ilə bağlı uzunmüddətli nəzarət mexanizminin qurulmasını tapşırıb.

Təhlil.az xəbər verir ki, Dövlət başçısı bununla bağlı açıqlamasında deyib: "Hökumət bloqerlər və onlayn platformaların fəaliyyətinə nəzarəti gücləndirməli, rəqəmsal mühitdə yaranan “şəbəkə xaosunun” qarşısını almaq üçün qəti tədbirlər görməlidir".

Si Cinpinin sözlərinə görə, məqsəd internet məkanında təhlükəsiz, stabil və dövlətin maraqlarını qoruyan idarəetmə modelinin formalaşdırılmasıdır.

O, şəbəkədə yaranan pozuntulara qarşı “qılınc çəkmək”, qəti addımlar atmaq, bu pozuntuları doğuran maraq zəncirlərini qırmaq və onların yaranmasına şərait yaradan amilləri aradan qaldırmaq zərurətini vurğulayıb.

Rəsmi Pekin son illər sosial media, kontent istehsalı və onlayn platformalara nəzarəti ardıcıl olaraq sərtləşdirir. Bu addımların ölkədə informasiya axınını daha ciddi şəkildə tənzimləməyə yönəldiyi bildirilir.