Zelenski Avropa liderləri ilə sülh planını müzakirə etdi

Ukrayna Prezidenti Vladimir Zelenski Fransanın Prezidenti Emmanuel Makron, Böyük Britaniyanın Baş naziri Keyr Starmer və Almaniya Kansleri Fridrix Merts ilə birgə görüş keçirib.

Təhlil.az xəbər verir ki, Dövlət başçısı görüşdən sonra yayımladığı açıqlamada tərəfdaş ölkələrə Ukraynaya göstərdikləri “fundamental dəstəyə” görə təşəkkür edib.

Zelenskinin sözlərinə görə, görüşdə Ukrayna və bütün Avropa üçün sülh planı geniş şəkildə müzakirə olunub. O, ABŞ Prezidentinin Donald Trampın və onun komandasının müharibəyə son qoymaq istiqamətindəki səylərini yüksək qiymətləndirib:

“Amerika tərəfi tərəfindən hazırlanmış sənəd üzərində işləyirik. Bu, əsl və ləyaqətli sülhü təmin edəcək bir plan olmalıdır. Bu fundamental mövqelərin nəzərə alınması üçün sıx əlaqələndirmə aparırıq”.

Ukrayna lideri əlavə edib ki, görüş zamanı növbəti addımlar razılaşdırılıb və prosesin davamı olaraq müvafiq səviyyələrdə komandaların birlikdə işləməsi barədə anlaşma əldə olunub.