Mirzoyan: "Türkiyə ilə normallaşma Bakı ilə sülh prosesinə müsbət təsir göstərə bilər"

Ermənistanın xarici işlər naziri Ararat Mirzoyan Ankara ilə münasibətlərin normallaşdırılmasının Azərbaycanla sülh prosesinə mənfi deyil, əksinə müsbət təsir göstərə biləcəyini bildirib.

Təhlil.az xəbər verir ki, nazirin sözlərinə görə, Türkiyə ilə diplomatik münasibətlərin qurulması və sərhədlərin açılması Ermənistan üçün strateji əhəmiyyət daşıyır, eyni zamanda Azərbaycanla sülhün institusionallaşdırılması da vacib istiqamətdir:

“Ermənistan hər iki istiqamətdə səmimi səylər göstərir. Lakin bu iki proses bir-biri ilə şərtləndirilmir. Əgər səbəb-nəticə əlaqəsini müəyyən etməyə çalışsaq, görünür ki, Türkiyə ilə münasibətlərin tam normallaşdırılması Ermənistan və Azərbaycan arasındakı normallaşma prosesinə mənfi deyil, müsbət təsir göstərəcək”, - deyə, Mirzoyan vurğulayıb.

Nazir həmçinin nəqliyyat-kommunikasiya xətlərinin açılması ilə bağlı 8 avqust Vaşinqton Sülh Sammitində razılaşdırılan prinsipləri xatırladıb: 

Bu çərçivədə razılaşdırılmış TRIPP marşrutunun Azərbaycanı Naxçıvanla, Ermənistanı isə digər ölkələrlə birləşdirəcəyini qeyd edən Mirzoyan, İrəvanın bu layihənin mümkün qədər tez həyata keçirilməsi üçün fəal səylər göstərdiyini də bildirib.