Vyetnamda daşqınlar: 16 nəfər öldü, minlərlə ev su altında qaldı

Vyetnamın mərkəzi bölgəsində bir neçə gündür davam edən güclü yağışlar və daşqınlar fəsadlarını artırmaqdadır.

Təhlil.az xəbər verir ki, bu barədə ölkənin Təbii Fəlakətlərlə Mübarizə və Bəndlərə Nəzarət İdarəsi məlumat yayıb.

Son məlumata əsasən, təbii fəlakət nəticəsində ölənlərin sayı 16 nəfərə yüksəlib, 5 nəfər itkin düşmüş hesab olunur.

Şiddətli yağışlar nəticəsində 43 mindən çox ev su altında qalıb, həmçinin 10 min hektardan çox çəltik sahəsi və digər kənd təsərrüfatı əraziləri zərərə uğrayıb.

Rəsmi qurumlar bölgədə axtarış-xilasetmə tədbirlərini davam etdirir, əhalinin təhlükəsiz zonalara köçürülməsi istiqamətində işlər görülür.