Pakistan və Əfqanıstan sərhəd gərginliyini azaltmaq üçün İstanbulda danışıqlara başlayır

Pakistan və Əfqanıstan arasında son aylarda artan sərhəd gərginliyi fonunda iki ölkə bu gün (cümə axşamı) İstanbulda növbəti əsas danışıqlar raundunu keçirməyə hazırlaşır.

Təhlil.az xəbər verir ki, görüşün məqsədi sərhədyanı toqquşmalardan sonra gərginliyi azaltmaq və davamlı atəşkəs mexanizmi yaratmaqdır.

Türkiyə və Qətərin vasitəçiliyi ilə təşkil olunan danışıqlarda Pakistanın diplomatik və hərbi nümayəndə heyətləri artıq İstanbula gəlib.

Türkiyə Xarici İşlər Nazirliyinin məlumatına görə, tərəflərin atəşkəs pozuntularının yoxlanılması və məsuliyyət mexanizminin müəyyənləşdirilməsi barədə razılığa gəlməsi gözlənilir.

Bu görüş, oktyabr ayında keçirilən və müvəqqəti razılaşma ilə başa çatan beş günlük danışıqlardan sonra baş tutur. Həmin razılaşma Pakistanın əsas tələbi – Əfqanıstan ərazisindən qaynaqlanan terror fəaliyyətlərinin dayandırılması məsələsini tam həll etməmişdi.